16 Ditët e Aktivizmit kundër Dhunës me Bazë Gjinore është një fushatë ndërkombëtare që ndodh çdo vit dhe zhvillohet nga data 25 Nëntor (Dita Ndërkombëtare për Eliminimin e Dhunës ndaj Grave), deri në datën 10 Dhjetor (Dita e Ndërkombëtare e të Drejtave të Njeriut), duke përfshirë edhe data të tjera të rëndësishme.

E njohur edhe si “16 Ditët”, kjo fushatë përdoret si strategji organizimi nga individët dhe grupet në mbarë botën për të bërë thirrje për parandalimin dhe eliminimin e dhunës ndaj grave dhe vajzave. Fushata e ka origjinën nga Instituti i Parë i Lidershipit Botëror të Grave, koordinuar nga Qendra për Lidershipin Botëror të Grave  në vitin 1991.

Çdo vit, shoqata “Unë Gruaja” organizon e udhëheq këtë Fushatë duke realizuar aktivitete të ndryshme ndërgjegjësuese e informuese lidhur me Dhunën me Bazë Gjinore dhe Dhunën në Familje në gjithë territorin e Bashkisë Pogradec. “Unë Gruaja” bashkëpunon ngushtësisht me Zyrën për Barazi Gjinore dhe Dhunën në Familje, si dhe me të gjithë anëtarët e tjerë të Mekanizmit të Referimit të Dhunës në Familje, Bashkia Pogradec. 

Gjatë këtyre ditëve rrjeti i personave të kontaktit të shoqatës “Unë Gruaja” luan një rol të jashtëzakonshëm për informimin e komunitetit në zonat rurale, duke mobilizuar vajza, gra, djem dhe burra, si edhe aktorë të tjerë të pushtetit vendor, institucioneve shëndetësore, arsimore etj. në këto zona.